مؤسســــة عــــدن الغـــد للإعــــلام
آخر تحديث للموقع الثلاثاء 31 مارس 2020 08:36 صباحاً

ncc   

{ فوق وتحت الطاولة }
فيروسات الاشتراكي
العالقين بالخارج يا رئيس الوزراء
خطر الفوبيا على توجيه الرأي العام .
هل كورونا ... سيوقف الحروب ؟
تداعيات كورونا المدمرة
قائد أصيل يتحمل المسئولية
آراء واتجاهات

كلام باللحجي كيف حالك يا ((ريال)) نحنا جوعنا..؟!

عبدان دهيس
الذهاب لصفحة الكاتب
مقالات أخرى للكاتب
السبت 08 سبتمبر 2018 12:51 مساءً

شوه هذي اللعبه وشوه هذي الملعابة .. منوه هذا المعرص بن المعرص ... والروفل بن الروفل .. إللي جالس يلعب بالبلاد والعباد.. الدولار طلع .. الريال حقنا نزل.. الريال السعودي طلع .. الريال حقنا أِشترق ودوخ.. كملتونا وكملتوا جدات جداتنا فجايع .. عيب عليكم دخوتوا بنا .. ((السبار)) زادت قيمته أضعاف مضاعفة .. خافوا الله .. كل شي زاد.. وين تبونا نهب.. نحنا جوعنا .. نحنا فقرنا .. والزيادة حقت الحكومة – (الثلاثين في الميه) – أن صدقت – شوه هيه ..؟ ماشي بتسيقك حتى ماي .. نحنا هرمنا .. نحنا شيبنا.. نحنا أنقرضنا .. الدولار طلع .. الريال نزل.. ماشي عاد معانا هرجه ثاني غير هذي الهرجه.. من صبح الله الناس يقولوا .. يارزاق .. يافتاح.. ياعلي ياعليم.. ونحنا نقول : ((الدولار طلع .. الريال نزل )).. ماشي عاد معانا كلام غير هذا الكلام .. الناس اللي حولنا يعيشوا في حياة النعيم .. ونحنا في حياة الجحيم والتعب والنكد .. (الدولار طلع .. الريال نزل) شغلونا وشغلوا حالنا .. ودقدقونا لا العظم..!

خلاص .. ذلحين خلونا نتخبر ((الريال ))حقنا.. شوه سبب هذي ((الفلتة الكبيرة )) اللي فلتها على رأسه ورجولة .. وخلت قيمته أمام العملات الأجنبية.. ((بأوله وبيستين)) .. خلونا نسأله:

· كيف حالك يا ((ريال يمني)) ..يافشفشي .. يابشبشي .. ياطنفشي .. يابنطشي ..؟
- والله يا((لحجي)) ياصاحبي .. أنا مريض من داخل قلبي..!

· مريض يا ((ريال)) شوه فيك ياعيوني وياقلبي وياتاج راسي .. شوه تحس بضريب .. عندك سكري أو حمه أو أسهال أو فقر دم .. تباني وديك عند ((التختر)) يداويك..؟
- قلت لك يا ((لحجي)) أنا مريض من ((باطل الشرعيه))حقتكم .. بهذلت بي بهذال .. كل يوم هات يا طباعه وياطبيع .. ورق من حق الله طلبناك عرفها ((لبان وبول حمير)) .. بلا كوفيه ولا طربوش ولا سروال – على ما تقولوا طباعه.. بلا ((غطاء)) – أصبح راسي مكشوف لمن هب ودب.. الدولار والريال السعودي ركبوا فوقي ركيب .. ناقص ما يعرونوني ويكشفوا ((مؤخرتي)) – على ما تقولوا .. ((عورتي)) – خلاص ذلحين عورتي قدها مكشوفة شوه عاد باقي .. هذا الا قلة حياء .. الله المستعان عليهم.. وين كانت قيمتي ياجبل ما يهزك ريح .. من يوم ((حكومة الشرعية )) .. وأنا كل يوم وزني ينقص قليل.. وقيمتي تنزل لا تحت.. لا تحت .. رجعت كما الهيكل العظمي .. ولا عاد فيني روح .. ولا لحم.. ولا شحم .. ولا حتى دم باقي في عروقي .. الدولار والريال السعودي في راحة ونعيم وأنا في جحيم .. ماشي عاد فيني ((فاقة)) للأكل .. عايش على ((ماي الحياة)) اللي يقولوله : ((دريب )) مغذي..!

· طيب تمام .. تمام .. يا((ريال )) .. بس نحنا الشعب.. شوه ذنبنا.. وشوه لأمهات أمهاتنا من دخل .. لو كانت بينك وبين ((الشرعية)) مشاكل ..؟ نحنا نبا قيمتك ترجع كما كانت .. شوفنا بنهب لا الهاوية.. شوف بيقع جوع .. والجوع أنته قدك دراي ماشي يرحم.. بيقع نهب وسرقة وقتل.. وبنرجع خص من الصومال هل هذا يرضيك يا ريال ..؟
- تبوا مني الصدق .. كلموا ((الحكومة الشرعية)) حقتكم .. الأمور كلها بيداتها .. تقدر تخلي قيمتي كما كانت .. وتقدر تبهذل بي وتنزلني لا الحضيض .. هبوا عند ((الحكومة الشرعية )).. تظاهروا.. صلحوا مسيرات واحتجاجات سلمية .. أفعلوا عصيان مدني .. قفلوا مرافق العمل الحكومية والمدارس .. منشان ((الحكومة)) تصحا وتنتبه لكم .. وتعرف أن معاها شعب مسؤولة عنه.. أما إذا سكتوا .. شوفوني باهب لا الهاويه.. وبيجي وقت بيكون معاكم ملات ((جونيه)) ريالات .. ماشي بتجيب لكم ((كيس دقيق)) .. فهمتوا كلامي.. ؟ ألحقوا أعماركم مادامكم في ((النسم)) .. قبل ما يقع ((حمل خوك وازاحف)) وقبل مايقع الفاس في الراس..!

· معناته يا ((ريال يمني)) عادك بتفلت لا تحت .. الله يستر..؟
- يه .. بفلت لا تحت .. وتحت التحت يالحجي .. عاده بيقع .. ((جاك السيل واهارب لاوين الهراب .. لاتهرب من الوادي في الوادي ذياب ..)) على أغنية الفنان العطروش ربنا يعطيه الصحة والعافية ..!

· طيب .. كلمني يا ((ريال يمني )) دلا .. دلا .. خليني أفهم الأمور تمام .. شوه ((السيل)) .. وشوه ((الهراب)) .. وشوه ((الذياب)) شعوك فجعتني ..فلت لي رجولي وركبي ..؟
- أنته يامواطن على نياتك .. ((الشرعية والحوثيين)) يتحاربوا من ((أربع سنين)) .. وانا قيمتي كل يوم تنقص قليل .. بسبب هذي الحرب .. ماشي عاد عقول .. الحكومة الشرعية راقدة وعاجزه عن إدارة الأمور .. معاها وزراء ((عويله جهال)) يعرفوا بس يلبسوا ((الكوت والكرفته)) ونصهم في الرياض ونصهم في القاهره .. ونصهم في الأردن .. و..و.. بس ((خلي التبق مستور)).. الشعب كل يوم يموت.. وهم عيدوا في الخارج هم وحريمهم وحريم حريمهم وعيالهم ودجاجهم وكلابهم وعز ماعندهم .. ثوروا على الحكومة.. بدال ماتلعنوني كل يوم من صبح الله .. شوه ذنبي انا وشوه لي من دخل .. طلوعي ونزولي ماشي بيداتي .. فهمتوني ذلحين .. أو عادكم ماشي فهمتوني.. اهرج يالحجي ..؟! أكتب الدولار طلع .. الريال نزل .. بيع لك كلام سوقك حامي هذي الأيام ..؟

· يه.. يا ((ريال يمني)) فهمناك .. كلنا في ((جحر الحمار)) سوى.. مع ألف سلامة..!



شروط التعليقات
- جميع التعليقات تخضع للتدقيق.
- الرجاء عدم إرسال التعليق أكثر من مرة كي لا يعتبر سبام
- الرجاء معاملة الآخرين باحترام.
- التعليقات التي تحوي تحريضاً على الطوائف ، الاديان أو هجوم شخصي لن يتم نشرها

شاركنا بتعليقك